کوئٹہ:10 فیصد مفت داخلہ نہ دینے والے پرائیویٹ سکولوں کے خلاف کارروائی کا فیصلہ
کوئٹہ: حکومتِ بلوچستان نے صوبے بھر میں ایسے نجی تعلیمی اداروں کے خلاف سخت کارروائی کا فیصلہ کیا ہے جو قانون کے مطابق مستحق طلبہ کو 10 فیصد مفت داخلہ فراہم نہیں کر رہے۔
محکمہ تعلیم کے حکام کے مطابق بلوچستان پرائیویٹ ایجوکیشنل انسٹی ٹیوشنز سے متعلق قواعد و ضوابط کے تحت ہر رجسٹرڈ پرائیویٹ سکول پر لازم ہے کہ وہ اپنی مجموعی داخلہ گنجائش کا کم از کم 10 فیصد حصہ مستحق اور مالی طور پر کمزور طلبہ کے لیے مفت مختص کرے۔
حکام کا کہنا ہے کہ متعدد نجی سکول اس قانونی شرط پر عمل درآمد نہیں کر رہے، جس کے باعث محکمہ تعلیم نے ایسے اداروں کے خلاف کارروائی شروع کرنے کا فیصلہ کیا ہے۔ اس سلسلے میں ضلعی سطح پر مانیٹرنگ ٹیمیں تشکیل دی جا رہی ہیں جو سکولوں کا ریکارڈ اور داخلوں کی تفصیلات کا جائزہ لیں گی۔
محکمہ تعلیم کے مطابق جو سکول قانون کی خلاف ورزی کرتے پائے گئے ان کے خلاف نوٹس جاری کیے جائیں گے، جرمانے عائد کیے جا سکتے ہیں، جبکہ مسلسل خلاف ورزی کی صورت میں رجسٹریشن معطل یا منسوخ کرنے سمیت دیگر قانونی اقدامات بھی کیے جائیں گے۔
حکام نے والدین سے بھی اپیل کی ہے کہ اگر کوئی نجی سکول مستحق بچوں کو مفت داخلے کی سہولت فراہم نہیں کر رہا تو وہ متعلقہ ضلعی تعلیمی دفتر یا محکمہ تعلیم میں شکایت درج کرائیں تاکہ بروقت کارروائی عمل میں لائی جا سکے۔
تعلیمی حلقوں نے حکومت کے اس اقدام کو خوش آئند قرار دیتے ہوئے کہا ہے کہ اس سے غریب اور باصلاحیت بچوں کو معیاری تعلیم کے بہتر مواقع میسر آئیں گے اور نجی تعلیمی اداروں میں قانون پر عمل درآمد یقینی بنایا جا سکے گا۔
