بلوچستان بھر میں دفعہ 144 نافذ، اجتماعات اور مظاہروں پر پابندی
کوئٹہ: بلوچستان حکومت نے امن و امان اور شہریوں کے تحفظ کے پیش نظر صوبے بھر میں 30 روز کے لیے دفعہ 144 نافذ کردی ہے۔ محکمہ داخلہ کے 23 ستمبر کے حکم کے مطابق پابندیاں فوری طور پر نافذ کی گئی ہیں۔
حکم نامے کے تحت عوامی مقامات پر پانچ یا اس سے زائد افراد کے اجتماع، دھرنوں، جلوسوں، ریلیوں اور مظاہروں پر پابندی عائد کی گئی ہے۔ اس کے علاوہ عوامی مقامات پر ہر قسم کے اسلحے کی نمائش، ساتھ رکھنے یا استعمال پر بھی پابندی ہوگی، تاہم قانوناً مجاز افراد اس پابندی سے مستثنیٰ ہوں گے۔
حکومت نے عوامی مقامات پر چہرہ ڈھانپنے یا شناخت چھپانے کے لیے ماسک، مفلر یا دیگر ذرائع کے استعمال پر بھی پابندی عائد کی ہے۔ قانون نافذ کرنے والے اداروں اور ضلعی انتظامیہ کو احکامات پر سختی سے عملدرآمد کی ہدایت کی گئی ہے۔
مدت: 30 روز
اطلاق: پورا بلوچستان
اہم پابندیاں: پانچ یا زائد افراد کا اجتماع، ریلی، جلوس، دھرنا، مظاہرہ، اسلحے کی نمائش اور شناخت چھپانے کے لیے چہرہ ڈھانپنا۔
