امریکہ کا جزیرہ لارک پر حملہ، ایران کا اردن میں امریکی اڈوں پر جوابی وار
امریکہ کا جزیرہ لارک پر حملہ، ایران کا اردن میں امریکی اڈوں پر جوابی وار
امریکی افواج نے آبنائے ہرمز میں واقع ایرانی جزیرے لارک پر کارروائی کرتے ہوئے دو ایرانی میزائل لانچروں کو نشانہ بنایا۔ امریکی سینٹ کام کے مطابق کارروائی میں ایرانی پاسدارانِ انقلاب کے ان عناصر کو ہدف بنایا گیا جو مبینہ طور پر آبنائے ہرمز میں بحری بارودی سرنگیں نصب کرنے کی تیاری کر رہے تھے۔
ایرانی ذرائع نے امریکی حملے میں فوجی اہلکاروں اور عام شہریوں کے جاں بحق اور زخمی ہونے کا دعویٰ کیا ہے، تاہم ہلاکتوں کی حتمی تعداد کی آزادانہ طور پر تصدیق نہیں ہوسکی۔
دوسری جانب ایران نے امریکی حملے کے جواب میں اردن میں موجود دو امریکی فوجی اڈوں، شاہ حسین اور الازرق، کو بیلسٹک میزائلوں سے نشانہ بنانے کا دعویٰ کیا ہے۔ اردن کے مطابق متعدد میزائلوں کو فضائی دفاعی نظام کے ذریعے روک لیا گیا، جبکہ ابتدائی امریکی رپورٹس میں بڑے جانی نقصان کی اطلاع نہیں دی گئی۔
امریکہ اور ایران کے درمیان یہ تازہ فوجی جھڑپ خطے میں کشیدگی میں ایک بار پھر اضافے کی نشاندہی کرتی ہے، جبکہ آبنائے ہرمز میں عالمی تجارتی اور تیل کی ترسیل پر بھی خدشات بڑھ گئے ہیں۔
