کوئٹہ: بلوچستان میں سیکیورٹی فورسز کی جانب سے جاری آپریشن “شعبان” کے دوران مزید تین دہشت گرد مارے گئے ہیں، جس کے بعد 5 جولائی سے شروع ہونے والے آپریشن شعبان اور دیگر انٹیلی جنس بیسڈ آپریشنز (IBOs) میں ہلاک دہشت گردوں کی مجموعی تعداد 126 تک پہنچ گئی ہے۔
سرکاری ذرائع کے مطابق سیکیورٹی فورسز نے مختلف اضلاع میں خفیہ اطلاعات کی بنیاد پر کارروائیاں کیں، جن میں دہشت گردوں کے متعدد ٹھکانے نشانہ بنائے گئے۔ حکام کا کہنا ہے کہ حالیہ کارروائی میں مزید تین دہشت گرد مارے گئے، جبکہ اسلحہ، گولہ بارود اور دیگر سامان بھی برآمد کیا گیا۔
ذرائع کے مطابق صرف آپریشن شعبان میں اب تک 88 دہشت گرد ہلاک کیے جا چکے ہیں، جبکہ 5 جولائی سے جاری مجموعی انسدادِ دہشت گردی کارروائیوں میں یہ تعداد بڑھ کر 126 ہو گئی ہے۔ سیکیورٹی اداروں کا کہنا ہے کہ کارروائیاں دہشت گرد نیٹ ورکس کے مکمل خاتمے تک جاری رہیں گی۔
یہ آپریشن بلوچستان میں حالیہ دہشت گرد حملوں کے بعد شروع کیا گیا، جن میں سیکیورٹی اہلکاروں اور شہریوں کو نشانہ بنایا گیا تھا۔ حکومت اور عسکری قیادت نے عزم ظاہر کیا ہے کہ دہشت گردی کے خلاف کارروائیاں مزید مؤثر انداز میں جاری رکھی جائیں گی تاکہ صوبے میں امن و امان کی صورتحال کو مکمل طور پر بحال کیا جا سکے۔
